DIE BYBEL IS ONS KOMPAS

Die gees van die huidige tyd is een van totale selfsug en relatiewe waarheid. Dit gaan alles oor my en wat ek wil hê. Ek onderwerp my aan geen hoër norm wat my besluite en optrede rig nie. Almal se "waarheid" is geldig en almal volg hul eie selfsugtige verstand. Die vyand floreer in hierdie moeras van relatiwiteit en die leemte wat dit veroorsaak. Die leuen word waarheid en die waarheid word 'n leuen. Dit lei tot uiterste dwaasheid, slegte keuses, oneindige konflik, hartverskeurende lyding en totale verdorwenheid. Mense se selfsugtige en visielose keuses laat hulself en ander elke keer ly.

Die Bybel weet alles van hierdie menslike dwaasheid. 1 Korinthe 1:18–25 verduidelik dat die wysheid van God (geopenbaar in die boodskap van die kruis van Jesus Christus) dwaasheid vir die wêreld is en die wysheid van die wêreld tot niet kom. Jakobus 1:6 sê dat wanneer ons begin twyfel aan God en sy waarhede, ons soos 'n golf is wat deur die wind heen en weer geslinger word. Spreuke 29:18 sê: "Waar daar geen visioen is nie, verwilderd die volk", wat eenvoudig beteken dat om ons rug op God te draai tot vernietiging lei.

Voice of Faith neem standpunt in teen die tendens wat ons rondom ons sien. Ons grond nie ons standpunte op relatiewe waarheid nie, of om reguit te praat, op menslike opinie nie. Ons probeer om ons standpunte te grond op 'n ingeligte en weloorwoë beoordeling van die Bybel as die onfeilbare Woord van God vir die hele lewe en vir alle tye.

Laat ons dit onderstreep: Die Bybel is nie verouderd soos sommige sê nie. Die moderne mens het nie die Bybel "ontgroei" nie. Die Bybel is steeds so geldig en relevant as ooit. Kyk net rondom na die konflik en lyding: Die mensdom het die goeie nuus van die Evangelie net so nodig soos ooit tevore in die geskiedenis.

Die Bybel dra die boodskap van verlossing wat die wêreld nodig het, selfs wanneer dit dit ontken. In die Bybel openbaar God sy glorieryke self aan ons en wys Hy ons die weg van die ewige lewe deur sy Seun, Jesus Christus, wat vir ons aan die kruis gesterf het. Die Bybel bied ook goddelike lig en insig, wat ons 'n beter manier wys om te leef — 'n beter manier om die lewe se vrae en uitdagings te benader en op te los. Beter, omdat dit gegrond is op die natuur van God as 'n heilige, goeie en wyse God wat die beste vir Sy skepping wil hê. Beter, omdat dit lei tot die vrede en welstand wat die hele samelewing sal bevoordeel.

So, die Bybel is ons onfeilbare kompas. Of liewer, die Bybel is steeds ons kompas, ten spyte van die druk wat ons as gelowiges ervaar om die Woord te ontken en aan wêreldse standaarde te konformeer. Ons is oortuig dat baie ander soos ons glo en ons kommer deel oor dinge wat in ons land gebeur wat duidelik in stryd is met die Bybelse boodskap van geregtigheid en vrede.

Aan hulle sê ons, sluit by ons aan om op te staan vir Bybelse waarheid en om aksie te neem. Gelowiges het 'n Godgegewe profetiese roeping om die wêreld die beter alternatief te wys. Om die wêreld na God se koninkryk, ware geregtigheid en 'n vreedsame bestaan te rig. Ons nooi u uit om ons hierin te toets: Die standpunt wat ons inneem en die aksies wat ons op verskeie kwessies voorstel, is uitsluitlik gegrond op ons biddende begrip van wat die Bybel leer.

So, ons is nie 'n politieke drukgroep nie. Ons is gewone gelowiges wat God wil verheerlik en ons naaste wil dien deur sy Woord te gehoorsaam en deur ander aan te moedig om dieselfde te doen. Wanneer gelowiges saam opstaan, kan ons 'n betekenisvolle verskil maak in 'n lydende wêreld wat Jesus desperaat nodig het.

Voice of Faith, die Bybelse manier om 'n verskil te maak.